پاکستان میں کورونا کے وار جاری، کیسز چار ہزار سے زائد، 63 ہلاکتیں

پاکستان میں کورونا وائرس کے متاثرین کی کل تعداد چار ہزار 322 ہو گئی ہے جبکہ ملک میں اب تک 63 افراد ہلاک ہوئے ہیں۔ 

جمعرات کو جاری کیے گئے سرکاری اعداد و شمار کے مطابق ملک میں کورونا کے اب تک 4 ہزار 322 مصدقہ کیسز سامنے آئے ہیں جبکہ صحت یاب ہونے والوں کی تعداد 572 ہے۔ 

پاکستان میں کورونا کے 31 مریضوں کی حالت تشویش ناک بتائی جا رہی ہے۔

گزشتہ چوبیس گھنٹوں میں 248 نئے کیسز سامنے آئے ہیں جبکہ پانچ ہلاکتیں ہوئی ہیں۔

ترجمان پرائمری اینڈ سیکنڈری ہیلتھ کیئر ڈیپارٹمنٹ پنجاب کے مطابق گزشتہ چوبیس گھنٹوں میں صوبے میں کورونا کے 58 نئے کیسز سامنے آئے ہیں جس کے بعد مریضوں کی تعداد 2 ہزار 171 ہو گئی ہے۔

پنجاب میں کورونا متاثرین میں 695 زائرین، 657 رائے ونڈ سے وابستہ افراد، 58 قیدی اور 756 عام شہری شامل ہیں۔ اب تک کورونا وائرس سے صوبے میں 17 اموات ہوئی ہیں جب کہ 35 مریض صحت یاب ہو کر گھر جا چکے ہیں۔ آٹھ کی حالے نازک بتائی جا رہی ہے۔

وفاقی حکومت کی جانب سے جاری کیے گئے اعدادو شمار کے مطابق پنجاب کے بعد صوبہ سندھ میں کورونا وائرس کے سب سے زیادہ کیسز موجود ہیں۔ سندھ میں کورونا کے 1036 کیسز سامنے آئے ہیں جب کہ 280 افراد صحت یاب ہوئے ہیں۔ صوبے میں اب تک 20 افراد کے ہلاک ہونے کی تصدیق کی گئی ہے۔

پنجاب کے بعد سندھ میں سب سے زیادہ کرونا کے کیسز سامنے آئے ہیں۔ فوٹو اے ایف پی

خیبر پختونخوا میں کورونا کے 560 مریضوں کی تصدیق ہوئی ہے۔ صوبے میں 20 ہلاکتیں ہوئی ہیں جبکہ 74 افراد کے صحت یاب ہونے کی تصدیق کی گئی ہے۔

گلگت بلتستان میں 213 افراد کے کورونا وائرس میں مبتلا ہونے کی تصدیق کی گئی ہے جبکہ علاقے میں 96 افراد صحت یاب اور تین افراد ہلاک ہوئے ہیں۔

بلوچستان میں کورونا وائرس کے 212 مریض سامنے آئے ہیں جبکہ صوبے میں وائرس سے دو افراد جان سے ہاتھ دھو بیٹھے ہیں۔ بلوچستان میں وائرس سے صحت یاب ہونے والے افراد کی تعداد 76 ہے۔

وفاقی دارالحکومت اسلام آباد میں کورونا وائرس کے مریضوں کی تعداد 102 ہے جن میں سے 10 صحت یاب ہوئے جبکہ ایک ہلاکت ہوئی ہے۔

پاکستان کے زیرانتظام کشمیر میں وبا سے متاثرہ افراد کی تعداد 28 ہے، ایک شخص صحت یاب ہوا ہے جبکہ علاقے میں کوئی ہلاکت نہیں ہوئی۔